ကလေးမြို့ ရဲ ဒလံတွေစီးတဲ့ကားကို မီးရှို့ဖျက်ဆီး

စစ်ကိုင်းတိုင်း၊ ကလေးမြို့ပြည်သူ့ခံတပ်သို့ အရပ်ဝတ်နဲ့ရောက်လာတဲ့ ရဲ ဒလံတွေစီးတဲ့ ကားကို မနေ့ညက မီးရှို့ဖျက်ဆီးလိုက်တယ်လို့သတင်းရရှိပါတယ်။

မျက်မြင်တစ်ဦးက “ဒလံတွေရဲ့ ကားကို ခံတပ်မရွေ့ခင် အကုန်ဖျက်ဆီးပြီးတော့ အဲ့ဒါကို ဗိုလ်ချုပ်လမ်းပေါ်မှာ မီးရှို့တယ်။ အချိန်ကတော့ ညနေ ၅ နာရီလောက်ကပါ” လို့ပြောပါတယ်။

ပြည်သူ့သပိတ်ခံတပ်တွင် မတ်လ (၃၁)ရက်တွင် အရပ်ဝတ်နဲ့ ယာဉ်ထိန်းရဲ နဲ့ ရဲ ၄ ယောက်က အနက်ရောင်ကားတစ်စီးနဲ့ရောက်လာပြီး ပြည်သူတွေက စစ်ဆေးရာ အမှုမှန်ပေါ်ပေါက်သွားပါတယ်။

ဒါကြောင့် ၎င်းတို့ကိုထိန်းသိမ်းစောင့်ရှောက်ထားပြီး ဧပြီလ (၂)ရက်နေ့က ပြည်သူဘက်က ဖမ်းဆီးထားတဲ့ ဒလံ ၇ ယောက်နဲ့ စစ်တပ်ဖက်က ဖမ်းဆီးထားတဲ့ လူ ၉ ယောက် အချင်းချင်းလှယ်လဲကြပါတယ်။