ချင်းပြည်နယ်တွင် ဒန့်ဒလွန်မှကုန်ချောထုတ်လုပ်ဖို့ ဗီယက်နမ်ကုမ္မဏီက စိတ်ဝင်စား

 

 

ချင်းပြည်နယ်တွင် ဒန့်ဒလွန်မှကုန်ချောထုတ်လုပ်ဖို့ ဗီယက်နမ်ကုမ္မဏီက စိတ်ဝင်စား

ဗီယက်နမ်နိုင်ငံက TMTM ကုမ္မဏီက ချင်းပြည်နယ်မှာ ဒန့်ဒလွန်နဲ့ကုန်ချောထုတ်လုပ်ဖို့ ချင်းပြည်နယ်ကုန်သည်များနှင့်စက်မှုလက်မှုလုပ်ငန်းရှင်များအသင်း နဲ့ UMFCCI မှာ ဒီကနေ့ ဆွေးနွေးကြပါတယ်။

ယင်းဆွေးနွေးမှုတွင် TMTM ကုမ္မဏီမှ Senior Consultant- International Programs Pro Nguyen Van Hanh နဲ့ Technical Advisor Truong Phi Phung တို့တက်ရောက်ကြပါတယ်။


ချင်းပြည်နယ်ကုန်သည်များနှင့်စက်မှုလက်မှုလုပ်ငန်းရှင်များအသင်း ဥက္ကဌ ဦးကပ်ခင်းပေါင်က “သူတို့က မြေရရင် သြဂုတ်လလောက်စချင်တယ်တဲ့။ ပထမတော့ ရှေ့ပြေးအစမ်းသဘောအနေနဲ့ ၅ ဧကအကျယ်အဝန်းလိုချင်ကြတယ်။ သူတို့က ချင်းပြည်နယ်ဆိုတာ လမ်းပန်းဆက်သွယ်ရေးခက်ခဲတယ်ဆိုတာသိတော့ ချင်းနဲ့ စစ်ကိုင်း၊ မကွေးနယ်နမိတ်မှာ နေရာသုံးခုလျာထားတယ်။ ဒါပေမယ့် ကျနော်က ပြည်နယ်ထဲမှာမြေရှာကြည့်ဖို့တိုက်တွန်းထားတယ်။ သူတို့က ဒန့်ဒလွန်နဲ့လုပ်ထားတဲ့မှုန့်တွေ၊ ခေါက်ဆွဲတွေ၊ ကော်ဖီမှုန့်လိုဟာမျိုးတွေထုတ်နေတယ်။ သူတို့က ထုတ်ကုန်တွေလည်းရှိပြီးသား၊ ဈေးကွက်လည်းအခိုင်အမာရှိပြီးသား” လို့ပြောပါတယ်။

ချင်းပြည်နယ်ဟာ အေးမြတဲ့ရာသီဥတုရှိတာကြောင့် ဒန့်ဒလွန်ပင်ဟာ အလွယ်တကူရှင်သန်နိုင်တဲ့ အပင်ဖြစ်ပါတယ်။ ဒန့်ဒလွန်ကနေ လူသုံးကုန်ပစ္စည်းအမျိုးမျိုး၊ ဒန့်ဒလွန်ဆီမှအစ စားသောက်ကုန်အမျိုးမျိုးထုတ်လုပ်ကြပါတယ်။