ချင်းပြည်နယ်မှာ ပထမဆုံး ကော်ဖီအခြောက်လှန်းစက် စတင်လည်ပတ်

ချင်းပြည်နယ်မှာ ပထမဆုံး ကော်ဖီအခြောက်လှန်းစက် စတင်လည်ပတ်

ချင်းပြည်နယ်ရဲ့ ပထမဆုံး ကော်ဖီအခြောက်လှန်းစက်ကို ဖေဖော်ဝါရီလ (၅)ရက်နေ့မှာ မင်းတပ်မြို့တွင်စတင်လည်ပတ်နေပါပြီ။

ဒီစက်ကို ဒိန်းမတ်အစိုးရက မြန်မာနိုင်ငံက SME လုပ်ငန်းတွေကိုထောက်ပံ့တဲ့ RBF(Responsible Business Fund) ကျပ်သိန်း (၁၉၂)အကုန်ကျခံတည်ဆောက်ထားတာပါ။

မင်းတပ်မြို့ရှိ Hornbill Chin ကော်ဖီ အခြောက်လှန်းစက်ရုံအားတွေ့ရစဉ်(ဓာတ်ပုံ-Mar Hung)

 

မင်းတပ်မြို့ Hornbill Chin ကော်ဖီပိုင်ရှင် စွန့်ဦးတီထွင်သူ ဆလိုင်းမာဟုန်းက အခုလိုပြောပါတယ်။

“ချင်းပြည်နယ်က အပူချိန်အားနည်းတဲ့တွက် အသီးအရွက်ကိုနေလှန်းတဲ့ချိန်က အရမ်းကြာတယ်။ အခု ကော်ဖီဟာဆိုရင်ပိုပြီးတော့ပြုစုနေလှန်းရတာ မနှစ်တုန်းကဆို ကော်ဖီသီးအခေါက်လှန်းတာ တစ်လကျော်စောင့်လိုက်ရတယ်။ အခြောက်လှန်းစက်နဲ့ဆို သုံးပတ်လောက်နဲ့ခြောက်သွားမယ်။ ကောင်းကျိုးအနေနဲ့ သပ်ရပ်တဲ့ကော်ဖီအရည်အသွေးမြင့်ထုတ်လုပ်နိုင်မယ်။ ဒီစက်အသုံးပြုခြင်းအားဖြင့် ဖုံအမှိုက်မဝင်တော့ဘူး။ အခြောက်ညီညာသွားမယ်။ ကော်ဖီမဟုတ်ပဲနဲ့ အခြား ဂျင်းတို့ ဆနွင်းနဲ့အခြားအသီးအရွက်ကိုလည်းအခြောက်လှန်းပြီးထုတ်လုပ်လို့ရပါသေးတယ်။ ဒီလအတွင်း ကော်ဖီလှော်စက်လည်း ရောက်လာမှာဖြစ်တဲ့တွက် ချင်းပြည်နယ်တစ်နေရာတည်းမှာ ကော်ဖီကိုကုန်ကြမ်းကနေ ကုန်ချောအထိထုတ်လုပ်နိုင်တော့မယ်။ အဓိကတော့ ချင်းပြည်နယ်ရဲ့ဂုဏ်ပုဒ်တစ်ခုဆောင်နိုင်ဖို့ ကော်ဖီထုတ်ကုန်ကို အဆင့်အတန်းမှီမှီထုတ်လုပ်ဖို့ရည်မှန်းထားတယ်”လို့ပြောပါတယ်။

အခြောက်လှန်းစက်ရုံမှာ တစ်ကြိမ်အခြောက်လှန်းရင် (၅၆၀)ပိဿာ လှန်းနိုင်ပါတယ်။ ဆလိုင်းမာဟုန်းဟာ ကော်ဖီဝိုင်ကိုလည်း ထုတ်လုပ်ထားပါတယ်။