ဇူလိုင်လမှစပြီး ချင်းပြည်နယ်မှာ မဲစာရင်းစတင်ကောက်ခံတော့မယ်

ဇူလိုင်လစပြီး ချင်းပြည်နယ်မှာ မဲစာရင်းစတင်ကောက်ခံတော့မယ်

၂၀၂၀ ခုနှစ် အထွေထွေရွေးကောက်ပွဲအတွက် ချင်းပြည်နယ်မှာ ဇူလိုင်လကပြီး မဲစာရင်းစတင်ကောက်ခံတော့မယ်လို့ ချင်းပြည်နယ် ရွေးကောက်ပွဲအဖွဲ့ခွဲ အတွင်းရေးမှူး ဦးလင်းကျော်ထံမှသတင်းရရှိပါတယ်။

ယင်းမဲစာရင်းကို ထွေအုပ်ဝန်ထမ်းတွေက ကောက်ခံမှာဖြစ်ပြီး ရလာတဲ့ မဲစာရင်းကို လ.ဝ.က ရုံးက စိစစ်ပေးမယ်လို့သိရပါတယ်။

ဦးလင်းကျော်က “ မဲစာရင်းကို ဇူလိုင်လကနေ စက်တင်ဘာလထိ ကောက်သွားမယ်။ ဆန္ဒမဲပေးပိုင်ခွင့်မရှိတဲ့သူတွေလည်းကောက်မယ်။ စာရင်းတွေကို ကျနော်တို့က ကွန်ပျူတာထဲမှာသိမ်းထားမယ်။ နိုင်ငံခြားကိုရွေ့ပြောင်းတဲ့သူတွေကို မှတ်ချက်ထဲမှာမှတ်ထားမယ်။ ရပ်ဝေးကိုကာလကြာသွားနေတဲ့သူတွေကိုလည်း မှတ်ထားမယ်။ သူတို့ကို ဒီမှာမဲပြန်ထည့်ချင်တယ်ဆိုရင် ပုံစံ ၃ နဲ့ပြန်လျှောက်လို့ရအောင်လုပ်မယ်။ အဲ့လိုမလျှောက်တဲ့သူတွေကိုတော့ မဲပေးပိုင်ခွင့်စာရင်းထဲမှာမထည့်တော့ဘူး” လို့ပြောပါတယ်။

အိမ်ထောင်စုစာရင်းထဲမှာ နာမည်သာရှိပြီး နိုင်ငံခြားသို့ရောက်သွားတဲ့သူတွေကို မိသားစုဝင်တွေကလည်း ပြောပြစေချင်ကြောင်း၊ ဒါမှသာ မဲစာရင်းအတိအကျရရှိနိုင်မယ်လို့ဆိုပါတယ်။

၂၀၁၅ ခုနှစ်ရွေးကောက်ပွဲတွင် နိုင်ငံခြားရောက်သွားတဲ့သူတွေနဲ့ သေဆုံးပြီးသားလူတွေကို ဆန္ဒမဲပေးပိုင်ခွင့်စာရင်းထဲမှာ ၎င်းတို့နာမည်တွေပြန်ပါလာတာကိုတွေ့ရပါတယ်။

၂၀၂၀ အထွေထွေရွေးကောက်ပွဲကို နှစ်ကုန်ပိုင်း နိုဝင်ဘာလတွင်ကျင်းပမယ်လို့ သတင်များထွက်ပေါ်နေပါတယ်။