တမူးမြို့တွင် စစ်တပ်ကပစ်လို့ ၂ ဦးသေဆုံး၊ ၇ ဦးဒဏ်ရာရရှိ

အိန္ဒိယ-မြန်မာ နယ်စပ် စစ်ကိုင်းတိုင်းဒေသကြီး၊ တမူးမြို့တွင် မနေ့ည (မတ် ၂၅) ည ၁၁ နာရီခွဲခန့်တွင် စစ်တပ်နဲ့ ရဲတို့က နီလာဝင်းရွှေ နဲ့ ဖုန်းဆိုင်သို့ဝင်စီးစဉ် လူစုလူရုံးဖြစ်ကာ စက်သေနတ်နဲ့ပစ်ခတ်လို့ ၂ ဦးသေဆုံးပြီး ၇ ဦးဒဏ်ရာရရှိကြတယ်လို့သတင်းရရှိပါတယ်။

သေဆုံးသူဟာ စန္ဒကူးရပ်ကွက်က ကိုမျိုးမြင့်အောင် (ခ)ဖိုးကုလား (၃၄နှစ်)ဖြစ်ပြီး အလောင်းကို ဒီနေ့ ညနေ ၂ နာရီတွင် သဂြိုလ်မှာဖြစ်ပါတယ်။ ၎င်းတို့ ဇနီးနဲ့ ကလေး ၁ ယောက် ကျန်ရစ်ခဲ့တယ်။ ပြင်းထန်ဒဏ်ရာရရှိတဲ့ ကိုနန်းဦး (၃၀နှစ်ဝန်းကျင်)လည်း ဒီမနက် ၁၀ နာရီခန့်က ထပ်မံကျဆုံးသွားတယ်လို့သတင်းရရှိပါတယ်။

အခင်းဖြစ်စဉ်နဲ့ပတ်သက်ပြီး ဒေသခံတစ်ဦးက “မနေ့ည ၁၁ နာရီခွဲလောက်က စစ်ကား ၂ စီးနဲ့ ရဲကား ၁ စီးက နီလာဝင်းရွှေဆိုင်ရှေ့မှာလာရပ်တယ်။ သူတို့က ဖုန်းလည်းရောင်းတယ်။ အိမ်တံခါးကိုဖွင့်ပေးဖို့ပြောပေမယ့် မဖွင့်တော့ သေနတ်ပါပစ်ဖောက်တယ်။ အိမ်ရှင်တို့က နိုင်ငံရေးနဲ့ပတ်သက်တာလည်းမရှိဘူး။ အိမ်ထဲလည်းမဝင်နိုင်ဘူး။ ဒါနဲ့အနီးနားကလူတွေ စုရုံးလာကြတာကို စစ်ကားပေါ်ကနေ စက်သေနတ်နဲ့လိုက်ပစ်တော့ ၁ ဦးပွဲချင်းသေဆုံးတယ်။ ၇ ဦးဒဏ်ရာရတဲ့ထဲမှာ ၃ ဦးက စိုးရိမ်းတဲ့အခြေအနေမှာရှိတယ်။ သူတို့က ဆီးခုံ၊ ခေါင်း၊ ရင်ဘတ်ထိတာ၊ ပေါင်ထိတာတွေရှိတယ်။ ဒဏ်ရာရတဲ့သူတွေကို ချက်ချင်း ပြည်သူ့ဆေးရုံကို ဆိုင်ကယ်နဲ့ပို့ကြတယ်” လို့ပြောပါတယ်။

မနေ့က တမူးမြို့က ဆန္ဒပြတဲ့သူတွေနဲ့ စစ်တပ်နဲ့ရဲတို့ဟာ ထွေအုပ်ရုံးရှေ့တွင်ထိုက်တိုက်တွေ့လို့ နာရီအတော်ကြာ ပိတ်မိပေမယ့် ငြိမ်းချမ်းစွာလူစုပြန်ခွဲကြပါတယ်။ အခုလို ပစ်ခတ်မှုဟာ တမူးမြို့တွင် ပထမဆုံးအကြိမ်ဖြစ်ပါတယ်။