ဒါရိုက်တာ ခရစ္စတီးနားခီက ရုပ်ရှင်ရိုက်ဖို့ မြန်မာဝတ္ထုနှစ်ပုဒ် ဝယ်ယူ

ခီမောင်နှံတို့ ဦးဆောင်တည်ထောင်ထားတဲ့ Central Base Productions က မြန်မာဝတ္ထုနှစ်ပုဒ်ကို ရုပ်ရှင်အဖြစ်ရိုက်ကူးဖို့ ဒီကနေ့ဝယ်ယူထားတယ်လို့ Central Base Productions လူမှုကွန်ရက်စာမျက်နှာမှာဖော်ပြထားပါတယ်။

စာရေးဆရာမကြီး ကြည်အေးရဲ့ “မောင် ကိုကို နဲ့မြနန္ဒာ” စာအုပ်နဲ့ ဆရာမကြီးခင်ခင်ထူးရဲ့ “တောမင်းသမီး” စာအုပ်တို့ဖြစ်တယ်။

ခရစ္စတီးနားခီက ၎င်းလူမှုကွန်ရက်စာမျက်နှာတွင် “နှစ်ပေါင်းများစွာ စိတ်ကူးခွင့်တောင်မရဲတရဲယဉ်ခဲ့ရသော…ကိုယ်အရမ်းကြိုက်နှစ်သက်ပြီး လေးစားတန်ဖိုးထားခဲ့ရသော ဆရာမကြီး ၂ဦးရဲ့ စာအုပ်၂အုပ်ကို ရုပ်ရှင်ရိုက်ခွင့်ရခဲ့တာဟာ မဟာအခွင့်အရေးတခုပါ။ ဒီအတွက် အရမ်းဝမ်သာမိပါတယ်…အဆင်ပြေအောင်စီစဉ်ပေးတဲ့ဆရာဦးဝင်းငြိမ်းကိုလည်း အထူးကျေးဇူးတင်ပါတယ်…ရင်ခုန်စိတ်လှုပ်ရှားမှုတွေနဲ့အတူ အရမ်းလည်းကြောက်မိပါတယ်…ဒါပေမယ့်လည်းအစွမ်းကုန်ကြိုးစားသွားပါမယ်နော်”လို့ရေးသားထားပါတယ်။

လက်ရှိချိန်မှာလည်း Central Base Productions က ဒီဇင်ဘာလကနေစပြီး Now & Ever ရုပ်ရှင်ရိုက်ကူးမှုစတင်တော့မှာဖြစ်တယ်။