လမ်းပေါ်သွားစဉ်ပစ်သတ်ခံရတဲ့ ဦးငွာလ်ရှမ်ပေါင် အလောင်း မြေမြှုပ်သဂြိုလ်

ကလေးမြို့၊ မွန်းလိုင်ရပ်ကွက်မှာနေထိုင်တဲ့ ဦးငွာလ်ရှမ်ပေါင်-Pa Ngul Sian Pau (Kum 64)ရဲ့ အလောင်းကို ဒီမနက် ၈ နာရီက ဒိုးဝိုင်းချောင်းသင်္ချိုင်းတွင်မြေမြှုပ်သဂြိုလ်သွားပါတယ်။

ဦးငွာလ်ရှမ်ပေါင်ဟာ ဧပြီ ၇ ရက် မနက် ၇ နာရီခန့်က ၎င်းတို့အိမ်ကနေ အိမ်နောက်ဘက်သို့သွားနေချိန် အကြမ်းဖက်သမား မအလ စစ်တပ်က နောက်ကျောဘက်ကနေ ပစ်ခတ်ပြီး ဝမ်းဗိုက်ဘက်ကိုပေါက်ထွက်သွားပါတယ်။

ရပ်ကွက်နေပြည်သူတစ်ဦးက “မနေ့ကတော့ ဝက်စာကျွေးနေတုန်းပစ်ခံရတယ်တဲ့။ သူက ဝက်စာယူဖို့လာ ပိုလုံခြုံတဲ့နေရာကိုရှောင်ဖို့သွားတာလာတော့မသိဘူး။ သူတို့အိမ်က ဗိုလ်ချုပ်လမ်းမကနေ တစ်လမ်းမြောက်လမ်းထောင့်မှာနေတယ်။ ဒါကို ဒုတိယလမ်းဘက်မှာသွားဖို့ အိမ်ပြင်ထွက်လာတာတဲ့”လို့ပြောပါတယ်။

ဒီမနက်တွင်လည်း တာဟန်း၊ မွန်းလိုင်၊ ကြို့သုံးပင်ရပ်ကွက်တွေမှာ အကြမ်းဖက် မအလ တပ်သားတွေ လမ်းပေါ်မှာနေရာယူထားတာတွေ့ရပါတယ်။

ကလေးမြို့တွင် မနေ့ညပစ်ခတ်မှုကြောင့် ပြည်သူ ၁၂ ဦးသေဆုံးပြီး အများအပြားဒဏ်ရာရရှိကာ လူ (၁၈)ယောက်ကျော်ဖမ်းဆီးခံရပါတယ်။