ဟားခါးမြို့မှာ မကြာခင် သားဖွားသင်တန်းကျောင်းဆောက်မယ်

ပြည်ထောင်စုဘတ်ဂျက်နဲ့ ဟားခါးမြို့မှာ မကြာခင် သားဖွားသင်တန်းကျောင်းဆောင် စဆောက်တော့မယ်လို့ ချင်းပြည်နယ်လူမှုရေးဝန်ကြီးထံမှသတင်းရရှိပါတယ်။

ဟားခါးမြို့ သားဖွားသင်တန်းကျောင်းဆောက်ဖို့ ကျန်းမာရေးနှင့်အားကစားဝန်ကြီးဌာနက ၂၀၁၈-၂၀၁၉ ဘဏ္ဍာနှစ်တွင် ကျပ်သန်း(၉၀၀)ကျော်ချထားပါတယ်။

အဆိုပါ သင်တန်းကျောင်းကို ဟားခါးပညာရေးကောလိပ်ကျောင်းအနီး ဧက(၂၃)အကျယ်အဝန်းပေါ်တွင်တည်ဆောက်မှာဖြစ်ပါတယ်။

ချင်းပြည်နယ်လူမှုရေးဝန်ကြီး ဦးပေါင်လွန်မင်းထန်က “မကြာခင် သင်တန်းကျောင်းတည်ဆောက်မယ့် ကုမ္မဏီတွေ တင်ဒါခေါ်တော့မယ်။ မြေနေရာလည်း လုံလုံလောက်လောက်ရှိတယ်။ ခုချိန် ချင်းပြည်နယ်မှာ သားဖွားဆရာမတွေအရမ်းလိုအပ်နေတယ်။ ကျောင်းဖွင့်ရင်တော့ တစ်နှစ်ကို အနည်းဆုံးကျောင်းသူ (၅၀)ကျော်ခေါ်မယ်”လို့ပြောပါတယ်။

ချင်းပြည်နယ်မှာ ဖလမ်းမြို့တွင် သူနာပြုသင်တန်းကျောင်းတစ်ခုသာရှိပြီး သားဖွားသင်တန်းကျောင်းမရှိသေးပေ။