အသားခုံတွင် အလေးချိန်မပြည့်မီရောင်းချသူတွေနဲ့ သတ်မှတ်ဈေးနှုန်းထက်ပိုရောင်းတဲ့သူတွေကို သတိပေး

အသားခုံတွင် အလေးချိန်မပြည့်မီရောင်းချသူတွေနဲ့ သတ်မှတ်ဈေးနှုန်းထက်ပိုရောင်းတဲ့သူတွေကို သတိပေး

ထန်တလန်မြို့နယ်ရှိ အသားခုံများတွင် အလေးချိန်မပြည့်မီပဲရောင်းချသူတွေနဲ့ သတ်မှတ်ဈေးနှုန်းကျော်လွန်ပြီးရောင်းချသူတွေကို မြို့နယ် စည်ပင်သာယာရေးအဖွဲ့က ဒီကနေသတိပေးထားကြောင်းသိရပါတယ်။

ဝက်သား နဲ့ အမဲသား တစ်ပိဿာမှာ စည်ပင်က ကျပ် ကိုးထောင်သတ်မှတ်ထားပေမယ့် ထန်တလန်မြို့ အသားခုံတွေက တစ်သောင်းနဲ့ရောင်းချနေတာကို ဒီကနေ့ စစ်ဆေးတွေ့ရှိပါတယ်။ ဒါ့ပြင် တစ်ပိဿာမှာ ၅ ကျပ်သားမှ ၁၀ ကျပ်သားထိလျော့နည်းနေတာလည်းတွေ့ရပါတယ်။

ထန်တလန်မြို့နယ် စည်ပင်သာယာရေးအဖွဲ့ အမှုဆောင်အရာရှိ ဦးဗန်ဇအုပ်က “ထန်တလန်မြို့မှာ အသားခုံ ၂ ခုံနဲ့ အသားခုံခွဲ တစ်ခုံရှိတဲ့ထဲမှာ ခုံ ၂ ခုံကို ဒီနေ့ အသားခုံတွေစစ်ဆေးတော့ တစ်ပိဿာ တစ်သောင်းနဲ့ရောင်းနေတာတွေ့တယ်။ ချက်ချင်းပဲ တစ်ထောင်ပြန်အမ်းခိုင်းတယ်။ အရင်နေ့တွေက ပိုရောင်းတဲ့သူတွေလည်းစစ်ဆေးအုံးမယ်။ အသားခုံဘက်ကတော့ အလေးချိန်ပိုလို့တောင်းတာတဲ့။ ကျနော်ကတော့ပြောလိုက်တယ်။ သတ်မှတ်ဈေးနှုန်းအတိုင်းရောင်းပါ။ သူတို့ပိုဝယ်ချင်ရင် တစ်ပိဿာခွဲနဲ့ဝယ်ပါစေလို့ပြောတယ်။ အလေးချိန်မပြည့်ပဲရောင်းတဲ့သူတွေလည်းသတိပေးထားတယ်။ သူတို့ကို နောက်ပတ်ကျရင် ကတိဝင်ခံချက်လက်မှတ်ထိုးခိုင်းမယ်။ သုံးကြိမ်သတိပေးခံရတဲ့သူတွေကို အသားခုံသိမ်းနိုင်တယ်လို့ဥပဒေထဲမှာရှိတယ်။

ချင်းပြည်နယ် တစ်ပြည်နယ်လုံးမှာ အမဲသားဖြစ်စေ၊ ဝက်သားဖြစ်စေ တစ်ပိဿာတွင် ကျပ် ၉ ထောင် ဖြစ်ရောင်းရန် စည်ပင်က သတ်မှတ်ထားပါတယ်။