နွမ်းပါးတဲ့ကျောင်းသားတွေကို ထောက်ပံ့ကြေး တစ်သိန်းဆီပေးအပ်

လက်ပံချောင်းကျောင်းသားဟောင်းများအသင်း (LAA) သားများအားတွေ့ရစဉ်

နွမ်းပါးတဲ့ကျောင်းသားတွေကို ထောက်ပံ့ကြေး တစ်သိန်းဆီပေးအပ်

ကလေးမြို့နယ် လက်ပံချောင်းကျေးရွာရှိကျောင်းများတွင်တက်ရောက်နေတဲ့ နွမ်းပါးတဲ့ကျောင်းသူ၊သား (၆)ဦးကို လက်ပံချောင်းကျောင်းသားဟောင်းများအသင်း (LAA)က တစ်ယောက် တစ်သိန်းဆီထောက်ပံ့ကြေးပေးအပ်နေတယ်လို့သတင်းရရှိပါတယ်။

ထောက်ပံ့ကြေးပေးအပ်တဲ့ကျောင်းသူ၊သားတွေဟာ မိဘမဲ့ပြီးချို့တဲ့နေသူ၊ မိခင် သို့မဟုတ် ဖခင်မရှိသူ၊ မိဘရှိပေမယ့် အလုပ်မလုပ်နိုင်တဲ့သူ၊ စားဝတ်နေရေးခက်ခဲတဲ့မိသားစုကိုရွေးချယ်ပေးအပ်ခဲ့ပါတယ်။

ႏြမ္းပါးတဲ့ေက်ာင္းသားမိဘထံ လက္ပံေခ်ာင္းေက်ာင္းသားေဟာင္းမ်ားအသင္းက ေထာက္ပံ့ေၾကေပးေနစဥ္

လက်ပံချောင်းကျောင်းသားဟောင်းများအသင်းရဲ့ တာဝန်ရှိသူ ဆလိုင်းဂျေစီက “ကျောင်းကော်မတီတွေ၊ ဆရာ၊မတွေ၊ ရပ်ကျေးအုပ်ချုပ်ရေးမှူးတွေနဲ့ ကျောင်းသားဟောင်းတွေပူးပေါင်းပြီး နွမ်းပါးတဲ့ကလေးတွေရှာနေတယ်။ ခုထိတော့ လေးယောက်ဆီမှာပေးထားပြီ။ ပညာရေးက အခမဲ့ဆိုပေမယ့် သူတို့ရဲ့ကျောင်းသုံးကိရိယာတွေဝယ်ဖို့၊ အာဟာရဖြည့်ဖို့ပေါ့နော်။ နောက်ထပ်နှစ်ယောက် ထောက်ပံ့ကြေးပေးဖို့ရှာနေတုန်း။ ဒီအလှူငွေက အသင်းအဖွဲ့ဝင် ခြောက်ယောက်စီကအလှူငွေနဲ့ပေးတာပါ။ နောက်နှစ်တွေလည်း ဆက်လက်ထောက်ပံ့ဖို့စီစဉ်ထားပါတယ်” လို့ပြောပါတယ်။

လက်ပံချောင်းကျောင်းသားဟောင်းများအသင်း ဟာ ၂၀၁၈ ခုနှစ်တွင် စတင်ဖွဲ့စည်းထားပြီး ရွာအတွင်းရှိ အ.ထ.က ကျောင်း၊ အ.မ.က ကျောင်းနဲ့ အ.လ.က ကျောင်းတွေရဲ့လိုအပ်ချက်တွေကိုကိုယ်ကျိုးစွန့်ဆောင်ရွက်ပေးနေတဲ့အဖွဲ့ဲဖြစ်ပါတယ်။