ဖလမ်းမြို့နယ် ရိနယ်စပ်လမ်းသစ်ဖောက်လုပ်တဲ့ Khengkang(ခင်ကန်)ရွာအနီးမှာ ရေပွန်တစ်ခု(၃၈)သိန်းတန်နဲ့ဆောက်လုပ်တဲ့ ရေပွန်သုံးခုဟာ ဆောက်လုပ်ပြီး တစ်လအကြာမှာ ကွဲအက်နေတယ်လို့ ဒေသခံကျေးရွာတွေဆီကနေ သတင်းရရှိပါတယ်။
ဒီရေပွန်တွေဟာ န.တ.လ(နယ်စပ်ဒေသနှင့် တိုင်းရင်းသားလူမျိုးများဖွံ့ဖြိုးတိုးတက်ရေးဦးစီးဌာန)ဘတ်ဂျက်နဲ့ဆောက်လုပ်ထားတာဖြစ်ပြီး Zinghmuh ကုမ္ပဏီနဲ့ Chin United ကုမ္ပဏီတို့က တာဝန်ယူဆောက်လုပ်ထားတယ်လို့သိရပါတယ်။
Khengkang ကျေးရွာအနီး ရေပွန်တစ်ခုကို မေ(၁၈)ရက်ကတွေ့ရစဉ်(ဓာတ်ပုံ-Thang Hlei Sum)
Khawrua ကျေးရွာအုပ်ချုပ်ရေးမှူး U Thang Hlei Sum(ဦးထန်လှဲဆုမ်)က “Zinghmuh(ဇီန်မှု)ကုမ္ပဏီတွေလုပ်ထားတဲ့ ရေပွန်နှစ်ခုကတော့ အပြင်ဘက်ကွဲအက်တဲ့နေရာတွေကို မာစလာနဲ့လာကပ်သွားတယ်။ အောက်ဘက်ကတော့ ကွဲအက်နေတုန်းပဲ။ Chin United ကုမ္ပဏီကလုပ်ထားတဲ့ ရေပွန်တစ်ခုကတော့ ဒီမနက်(မေ ၁၈ ရက်)ထိလာမပြင်သေးဘူး။ ဒီလို အပြင်ပန်ပြင်ထားပေမယ့် ကြာကြာတော့ခံမယ်မထင်ဘူး”လို့ပြောပါတယ်။
Khenkang ကျေးရွာအနီး ရေပွန်ကွဲအက်ကို ပြန်လည်ဖာထည်ထားတာ မေလ(၁၉)ရက်ကတွေ့ရစဉ်(ဓာတ်ပုံ-Thang Hlei Sum)
ဒီရေပွန်တွေဟာ ဒီနှစ် ဖေဖော်ဝါရီလလောက်က စတင်ဆောက်လုပ်တာဖြစ်ပြီး ဧပြီလခန့်က တည်ဆောက်ပြီးစီးခဲ့တာဖြစ်တယ်။
Zinghmuhကုမ္ပဏီတာဝန်ခံ U Lian Nawl(ဦးလျန်နှောလ်)က “မြေသားလမ်းသစ်ဖောက်ထားတာဆိုတော့ မြေစာက မြေသားတွေကိုဆွဲလာတာကြောင့် ရေပွန်တွေကွဲအက်တာဖြစ်တယ်။ Khengkang(ခင်ကန်)ရွာနားက ကျနော်တို့လုပ်ထားတဲ့ ရေပွန်နှစ်ခုကိုတော့ သွားပြင်လိုက်ပြီ”လို့ဆိုပါတယ်။
